Papo Benedikto la 16a
26.06.2005 - Anĝeluso
LA VIVON ONI RESPEKTU
ANKAŬ PER SINGARDEMO DUM VETURADO
Antaŭ la dimanĉa Anĝeluso Benedikto la 16a lanĉis alvokon por singardemo dum stirado en la aŭtovojoj, por eviti stratakcidentojn. La Papo krome memorigis la venontmerkredan Meson, en la festo de sanktaj Petro kaj Paŭlo apostoloj, je la tradicia ĉeesto de delegacio el la ortodoksa Patriarkejo de Konstantinopolo.
Karaj fratoj kaj fratinoj!
ni nin pretigas por celebri laŭ granda soleno la feston de la sanktaj Apostoloj Petro kaj Paŭlo, kiuj en Romo sigelis per la sango la anoncon de la Evangelio. La 29an de junio mi gvidos je la horo 9.30 la Sanktan Meson en la vatikana Baziliko: ĝi estos signifa okazo por substreki la unuecon kaj katolikecon de la Eklezio. Je la celebro ĉeestos, kiel en la pasinteco, speciala Delegacio sendita de la Ekumena Patriarko de Konstantinopolo. Mi invitas la fidelulojn de Romo, kiuj respektegas la sanktan Apostolojn Petron kaj Paŭlon kiel siajn specialajn patronojn, la pilgrimulojn kaj la tutan popolon de Dio preĝalvoki ilian ĉielan protekton sur la Eklezio kaj sur ĝiaj Paŝtistoj.
La fino de junio markas por la Landoj de la norda emisfero de la planedo la komencon de la somera sezono kaj por multaj personoj komenciĝas la tempo de feriado. Dum mi petdeziras al ĉiuj povi travivi trankvile kelkajn tagojn da meritata ripozo kaj de senstreĉiĝo, mi deziras adresi alvokon al singardo, al tiuj kiuj ekiras por atingi la diversajn lokojn de feriado. Ĉiutage, bedaŭrinde, speciale dum semajnfinoj, registriĝas en la stratoj akcidentoj kun multaj homaj vivoj tragike fortranĉitaj, kaj pli ol duono da viktimoj estas junaĝaj. Dum la multaj jaroj oni multon faris por preventi tiajn tragikajn eventojn, sed oni povas kaj oni devas fari pli per ĉies kontribuo kaj sindevigo. Necesas batali la distron kaj la supraĵecon, kiuj, dum momentero, povas damaĝi la propran kaj alies estontecon. La vivo estas valorriĉa kaj unika: oni devas ĉiam respekti kaj protekti ĝin, ankaŭ per konkreta kaj singarda konduto sur la stratoj.
La Virgulino Maria, kiu akompanas nin dum la ĉiutaga irado de la vivo, viglu sur tiuj, kiuj vojaĝas kaj Ŝi akirigu mizerikordon por la viktimoj de la stratoj. Al Ŝi, ĉiela Reĝino de la Apostoloj, en la baldaŭa festo de la sanktaj Apostoloj Petro kaj Paŭlo ni konfidu la Eklezion kaj ĝian misiistan agadon en la mondo.
Post la Anĝeluso la Papo adresis du salutojn: unu en la itala al diversaj grupoj; la dua, pollingve, al ĉiuj poloj ĉeestantaj en placo Sankta Petro kaj “al tiuj kiuj unuiĝas kun ni en la preĝado. Mi konfidas ĉiujn al Maria. Dio benu vin”.
Sekvis la fina bondeziro: “Mi bondeziras al ĉiuj bonan dimanĉon kaj bonan feriadon”.
