Papo Benedikto la 16a

20.05.2005

Al la membroj de la Papa Eklezia Akademio

En via servado en la vatikana diplomataro vi devas kultivi la du dimensiojn de la Eklezio: la kunuleco kaj la misiado. Jen la forta instigo kiun Benedikto la 16a adresis al la membroj de la Papa Eklezia Akademio - institucio por la formado de la vatikana diplomataro - kiun li akceptis aŭdience vendrede la 20an de majo. Por kiel eble plej bone plenumi ĉi tiun delikatan taskon, li diris, necesas firma kultura pretiĝo, esti ekzemplodonaj pastroj kaj ne lasi ke oni estu tentataj de la logiko de la povo. La papa eklezia akademio - kiu iam nomiĝis papa akademio de la ekleziaj nobeluloj - estis fondita en 1701 fare de papo Klemento la 11a. Ĝi havas la celon formi, per studkurso, junajn ekleziulojn por la diplomatia servado de la Sankta Seĝo, post akiro de la universitata diplomo pri kanona juro.