STATUTO DE I.K.U.E.
		Nomo kaj sidejo 1.  La Internacia Katolika Unuiĝo Esperantista (I.K.U.E.), fondita en 1910, estas tutmonda senprofita asocio de katolikaj esperantistoj. 2. La sidejo de IKUE estas ĝia Centra Oficejo (C.O.) en Romo, Italio. Patronoj 3.  La ĉielaj patronoj de IKUE estas: la Dipatrino de l’ Espero, Sankta Pio la Deka, Beata Maksimiliano Kolbe. 4.  La estraro povas peti eminentajn personojn patrone protekti IKUE, ĝiajn kongresojn, instituciojn k.s. per sia influo kaj aŭtoritato. Celo 5. IKUE celas pere de Esperanto: a)  plenumi la ordonon de Jesuo Kristo: “Iru en la tutan mondon kaj prediku la evangelion al ĉiu kreitaĵo” (Mark 16: 15); b)  montri la unuecon de la Eklezio uzante la internacian lingvon en ĝia liturgio kaj apostola agado; c)  kontribui al realigo de la homaj interkompreno, frateco kaj paco en la nuntempa mondo; d)  strebi “por ke ĉiuj estu unu” (Joh 17:21). Rimedoj 6. Por atingi tiujn celojn estas uzataj de IKUE ĉiuj efikaj rimedoj kaj precipe: a)  formado de komunumoj, prefere religiaj, por preĝi, kanti, studi kaj labori per kaj por Esperanto; b) organizado de E-bibliotekoj; c)  uzado de Esperanto en amaskomunikiloj; d)  eldono de oficiala organo, jarlibro kaj aliaj publikajoj; e)  enkonduko de Esperanto en internaciajn religiajn kunvenojn kaj eldono de koncernaj dokumentoj; f) starigo de katolikaj esperantistaj ligoj; g) kontaktiĝo kun diversaj ekleziaj instancoj kaj organizaĵoj; h) edukado de aktivuloj por la kristana esperantista agado. Membraro 7. Membro de IKUE povas farigi ĉiu, kiu subskribas deklaracion kaj akceptas ĝian Statuton. Oni distingas tri kategoriojn de membroj: a)  membroj-abonantoj (MA): ili pagas ordinaran kotizon; b)  membroj-subtenantoj (MS): ili pagas ĉiujare almenaŭ la duoblan bazan kotizon; c)  membroj dumvivaj (MD): ili pagas unufoje 20-oblan bazan kotizon.      Ĉiuj membroj ricevas membrokarton, la oficialan revuon kaj ĉiujn aliajn dokumentojn. Ili havas voĉdonrajton po unu voĉo en la ĝeneralaj kunvenoj. 8. La membrojn prezentitajn de landa ligo aŭ landa reprezentanto akceptas, malakceptas aŭ eksigas la estraro. Kontraŭ la decido de la estraro estas ebla plendo ĉe la ĝenerala kunveno, kies decido estas definitiva; ĝis la decido de la ĝenerala kunveno validas tiu de la estraro. 9. Membro, kiu ne pagis la kotizon antaŭ la fino de decembro, malgraŭ dufoja averto, estas konsiderata kiel eksiĝinta. Landaj ligoj, IKUEJ, Apartaj fakoj 10.Landa ligo estas organizaĵo de samlandaj IKUE-anoj. Ĝi estas memstara kaj elektas sian estraron, fiksas sian agadon kaj se eble organizas jarajn kunvenojn. 11.Internacia Katolika Unuiĝo de Esperantista junularo (IKUEJ) kunigas junajn katolikajn esperantistojn, kiuj agas en la kadro de IKUE kaj ties landaj ligoj. Ĝi estas administracie kaj finance memstara kaj laboras laŭ propra Statuto. 12. Aparta fako estas memstara organizaĵo de IKUE-membroj kunlaborantaj per speciala agado laŭ propra Statuto. 13. Landaj ligoj, IKUE kaj Apartaj fakoj raportas al la IKUE-C.O. pri sia stato kaj agado. Ili proponas al la ĝenerala kunveno kandidatojn je komitatanoj konforme kun art. 19 kaj 20. Organoj 14. La organoj de IKUE estas la ĝenerala kunveno,la plenumkomitato kaj la estraro kun sia Centra Oficejo. Ĝenerala kunveno 15. La ĝenerala kunveno estas komuna kunveno de ĉiuj membroj de la asocio kaj okazas minimume unufoje dum ĉiu jarduo. La estraro fiksas la lokon kaj daton de la ĝenerala kunveno, kiu povas okazi dum internacia kongreso. 16. La ĝenerala kunveno estas la plej alta organo de la asocio; ĝi decidas pri la IKUE-laborprogramo, elektas kaj eksigas la prezidanton, la membrojn de la plenumkomitato laŭ art. 20 kaj la estraron; prijuĝas la plendojn, kontrolas la financojn. Ĝi povas transdoni parton de siaj povoj al la plenumkomitato. 17. La tagordo de la ĝenerala kunveno starigita de la estraro devas esti anoncita en la oficiala revuo minimume tri monatojn antaŭ la kunveno. Pri aferoj ne anoncitaj en la tagordo la ĝenerala kunveno povas diskuti kaj decidi sed nur post la rajtigo de la prezidanto. 18. La estraro de IKUE estas ankaŭ estraro de la ĝenerala kunveno. En la ĝenerala kunveno partoprenas ĉiuj membroj. La estraro povas postuli, ke antaŭ ol voĉdoni la membroj prezentu sian validan membrokarton. Ĉiu voĉdonanto havas nur unu voĉon. La neĉeestantaj membroj povas, se necese, voĉdoni per letero aŭ per komisiito kun skriba mandato. La ĝenerala kunveno povas decidi, ke unuopaj decidoj pri proponoj aŭ elektoj okazu ne dum la kunveno, sed per letera voĉdono de la tuta membraro. Plenumkomitato 19. La plenumkomitato konsistas el la prezidantoj de la landaj ligoj, IKUEJ-sekcioj kaj apartaj fakoj kaj ties kromaj reprezentantoj, kiuj estas elektitaj de la ĝenerala kunveno por kvar jaroj. 20. Ĉiu ligo, fako aŭ sekcio rajtas proponi al la ĝenerala kunveno nomojn de siaj abonantaj, subtenantaj kaj dumvivaj membroj, el kiuj la ĝenerala kunveno elektas komitatanojn laŭ jena ordo: 1 komitatanon por ĉiu asocio havanta de 20 ĝis 99 membrojn, 2 komitatanojn por ĉiu asocio havanta de 100 ĝis 300 membrojn, 3 komitatanojn por ĉiu asocio havanta pli ol 300 membrojn. 21. En kazo de neceso, la plenumkomitato anstataŭas la ĝeneralan kunvenon pri urĝaj aferoj kaj faras provizoran decidon ĝis la venonta ĝenerala kunveno, kiu findecidos. 22. La plenumkomitato prizorgas la efektivigon de la decidoj de la ĝenerala kunveno, fiksas la kotizojn, konsilas kaj kontrolas la IKUE-estraron. Pro tio la estraro siavice raportas al la plenumkomitato dum ĝia kunveno pri sia agado. 23. La plenumkomitato kunvenas laŭeble ĉiujare, sed minimume unufoje dum ĉiu jarduo, kutime dum la IKUE-kongresoj. Ĝi elektas siajn proprajn prezidanton kaj sekretarion, kies tasko daŭras 4 jarojn. Ili okazigas, se necese, skriban voĉdonadon. Ili estas reelekteblaj. Estraro 24. La estraro konsistas el minimume 6 membroj kaj la prezidanto elektitaj por 4 jaroj dum ĝenerala kunveno el kandidatoj prezentitaj de landaj ligoj, IKUEJ kaj apartaj fakoj. 25. La estraro dividas inter siaj anoj la funkciojn de: 2 vicprezidantoj, sekretario, vicsekretario, kasisto kaj estrarano por specialaj taskoj. Se neniu estrarano estas sacerdoto, la estraro elektas religian konsilanton, kiu esprimas sian opinion pri la religia flanko de la IKUE-agado. 26. Estrarano, kiu per sia agado aŭ konduto ege malutilas al IKUE, la plenumkomitato eksigas kaj provizore anstataŭigas ĝis la venonta ĝenerala kunveno, kiu findecidos. 27. La estraro prizorgas pere de la Centra Oficejo la administradon de IKUE sub la kontrolo de la plenumkomitato. Ĝi nomas la landajn reprezentantojn laŭ propono de la landa ligo, fiksas la buĝeton, nomas la direktoron kaj ceterajn deĵorantojn de la C.O. kaj direktorojn aŭ administrantojn de aliaj oficejoj, elektas la redaktoron de Espero Katolika, kreas novajn servojn kaj aranĝojn, okazigas la internaciajn kongresojn, konferencojn k.t.p. La estraro de IKUE estas ankaŭ kongresestraro. La estraro estas kompetenta por ĉiuj aferoj, kiuj laŭ ĉi tiu Statuto ne estas rezervitaj al iu alia organo. 28. Neniu povas esti samtempe estrarano kaj komitatano. Iliaj funkcioj estas senpagaj. La plenumkomitato povas en escepta kazo doni al estrarano por difinita tasko, konvenan rekompencon. 29. Post 4-jara deĵorado la prezidanto, estraranoj kaj komitatanoj estas ĉiam denove reelekteblaj. Taskoj de estraranoj 30. La estraranoj interkonsentas per decidoj pri ĉiu sia agado. Ili povas ankaŭ decidi ke unu estrarano plenumu memstare, certan, difinitan taskon en la nomo de la tuta estraro. Por decidi ili kunvenas aŭ okazigas inter si skriban voĉdonadon. 31. La prezidanto reprezentas IKUE en juraj kaj nejuraj aferoj kaj subskribas ĉiujn oficialajn dokumentojn kun la sekretario aŭ direktoro de la C.O. kaj kun la kasisto. Li kontrolas kaj kunordigas la funkciojn de diversaj estraranoj. Li aranĝas oftajn personajn kontaktojn inter ili por interŝanĝi sugestojn kaj stimuli ĉiujn al reciproka kunlaboro. Li prezidas la kongresojn, ĝeneralajn kunvenojn kaj aliajn kunsidojn. 32. La vic-prezidanto(j) helpas kaj konsilas la prezidanton, anstataŭas lin en kunvenoj kaj kunsidoj, kiam li forestas. Post eksiĝo aŭ morto de la prezidanto la unua estas aganta prezidanto ĝis la elekto de nova prezidanto. 33. La sekretario faras protokolojn pri la kunsidoj de la estraro kaj de la ĝenerala kunveno, publikigas la oficialan raporton pri la IKUE-kongreso en la oficiala revuo. Li subskribas ĉiujn oficialajn dokumentojn kun la prezidanto kaj kasisto aŭ povas komisii ĉi tiun taskon al la direktoro de C.O. Almenaŭ unufoje dum la jaro li mem aŭ pere de la direktoro de la C.O. informas la plenumkomitaton pri la farita laboro. En kazo de malhelpo li estas anstataŭata de la vic-sekretario. 34. La kasisto projektas le IKUE-buĝeton En la ĝenerala kunveno li raportas pri la financa stato de la asocio. Li estas ankaŭ peranto inter la kasisto de la C.O. kaj la kasistoj de landaj ligoj. Li prizorgas la tutan IKUE-havaĵon. La Centra Oficejo 35. La Centra Oficejo (C.O.) estas la oficiala sidejo de IKUE, dependanta de la estraro. La C.O. direktas la tutan teknikan kaj administran laboron kaj dokumentas ĝin. Ĝi servas kaj realigas petojn de ĉiuj, kiuj sin adresas al IKUE. La agado de la C.O. estas ĉiujare reviziata de tri estraranoj, rajtigitaj de la prezidanto. 36. La deĵorantaro de la C.O. konsistas el: direktoro, sekretario, kasisto kaj tri konsilantoj; ĉiuj nomitaj de la estraro. Deĵoranto de la C.O. povas ankaŭ esti mem estrarano. Taskoj de C.O. - funkciuloj 37. La direktoro respondecas pri la tuta agado de la C.O. antaŭ la IKUE-estraro. Li povas anstataŭi la IKUE-Sekretarion laŭ ties komisio kaj tiam li subskribas ĉiujn oficialajn dokumentojn kune kun la prezidanto kaj la IKUE-kasisto aŭ lia reprezentanto-kasisto de la C.O. 38. La sekretario de la C.O. prizorgas la administradon de la C.O. 39. La kasisto de la C.O. prizorgas ĉiujn en- kaj el- spezojn de la C.O. konsente kun la IKUE-kasisto. Li administras tutan havaĵon de la C.O., tenas kontlibrojn sub la kontrolo de la IKUE-kasisto kaj almenaŭ du revizoroj. Li faras la elspezojn nur kontraŭ la pruva fakturo. 40. La konsilanto servas diversmaniere per sia helpo laŭ propra sperto kaj bezono de la C.O. Li rajtas partopreni en laborkunsidoj de la C.O.- funkciuloj. Oficiala revuo kaj landaj reprezentantoj 41. IKUE eldonas oficialan revuon “Espero Katolika”, kies ĉefredaktoro estas nomata de la estraro. Li starigas la redakcian komitaton. 42. La estraro aprobas landajn reprezentantojn de IKUE laŭ propono de la landa ligo se ĝi ekzistas, aŭ nomas ilin laŭ sia sperto. 43. La landa reprezentanto kolektas abonkotizojn por la revuo kaj sendas ilin al la IKUE-kasisto, varbas novajn membrojn kaj reprezentas la aferojn de IKUE antaŭ landaj aŭtoritatuloj, ĉu ŝtataj ĉu ekleziaj, se ne ekzistas landa ligo. Financa administrado de IKUE 44. La financa jaro estas la civil-kalendara jaro. 45. La monrimedoj de la asocio konsistas el: abon- kaj membro-kotizoj, donacoj, heredaĵoj, profito el vendado de IKUE-eldonaĵoj, reklamoj kaj pagitaj anoncoj en la revuo ks. 46. Komence de januaro la kasisto de IKUE prezentas la buĝeton por la kuranta jaro kaj submetas la kont-librojn de la pasinta jaro al la kontrolo de tri revizoroj elektitaj de la plenumkomitato. Post la kontrolo la revizoroj prezentas al la plenumkomitato kaj estraro la raporton pri la stato de la kontlibroj kaj financa administrado. 47. IKUE finance respondecas per la subskriboj de la prezidanto, de la sekretario, respektive de la direktoro de la C.O. kaj de la IKUE-kasisto aŭ resp. la kasisto de la C.O. 48. Kun escepto de par. 50 kaj 51, ĉiuj decidoj de la ĝenerala kunveno, plenumkomitato kaj la IKUE-estraro estas farataj per simpla plimulto de la voĉdonantoj. En kazo de la voĉegaleco, la prezidanto decidas. Se okazas percirkulera voĉdonado la propono estas akceptita se, dum tri monatoj post la forsendo de la cirkulero, duono de la voĉdonintoj. ne deklaras sin kontraŭ la akcepto. Rilato al aliaj organizaĵoj 49. IKUE povas interkonsenti kun aliaj organizaĵoj sur la kampo de kristana agado aŭ Esperanta, kondiĉe ke tio faciligas aŭ akcelas la atingon de ĝiaj celoj kaj neniel kaŭzas konflikton kun ĝia bazo. Statutŝanĝo kaj dissolvo 50. La statuto estas ŝanĝebla nur per la ĝenerala kunveno laŭ propono de la estraro aprobita de la plenumkomitato. La ŝangon devas aprobi 2/3 de la voĉdonintoj. 51. Dissolvo de IKUE okazas laŭ la samaj reguloj fiksitaj de la artikolo 50 por ŝanĝo de la statuto. Se la dissolvo estas aprobita de 2/3 de la voĉdonintoj devas esti farita decido ankaŭ pri la havaĵo de la asocio. Se pro iu ajn kaŭzo tiu decido ne estas farita, la prezidanto disponas pri la havaĵo kiel eble plej bone, atentante la celojn de la Unuiĝo; ĉiuokaze ne eblas disdoni la menciitan havaĵon inter la membrojn. Reprezentanto en Italio 52. Kaze, ke la Prezidanto de IKUE ne havas italan civitanecon, kaj ke por specifaj aktoj estas postulata la posedo de la menciita civitaneco, reprezentas IKUE en la rilatoj kun la italaj aŭtoritatuloj la direktoro de la C.O., aŭ, en la kazo ke ankaŭ ĉi-lasta ne estas itala civitano, reprezentanto nomumita ĉi-cele de la prezidanto. Portempaj kaj finaj dispozicioj 53. Por la unua apliko de ĉi tiu statuto kaj ĉiuokaze ne pli malfrue ol la 31a de decembro 1979, atende ke efektiviĝu la balotoj kaj nomunumoj antaŭviditaj kiel ordinara proceduro, la funkcioj de la estraro estas plenumataj fare de la prezidanto de IKUE; tiuj de la plenumkomitato fare de la membroj de la C.O.; tiuj de la vicprezidantoj kaj de la sekretario de IKUE fare de la direktoro de la C.O.; tiuj de la kasisto de IKUE, fare de la kasisto de la C.O. Sekve, kiel portempa aranĝo, IKUE sindevigas per la kunaj subskriboj de la prezidanto, de la direktoro de la C.O. kaj de la kasisto de la C.O. 54. En kazoj ne antaŭviditaj en ĉi tiu statuto aŭ pro diverseco de opinioj pri la aplikado de la paragrafoj, la estraro decidas provizore kaj submetas tiun decidon al la ĝenerala kunveno por findecido.   Evoluetapoj de la statuto La unua IKUE-statuto estis akceptita en Parizo 1-4-1910, modifita 23-7-1966 en St. Gallen, fine ĝi estis reviziita 19-8-1977 en Ĉenstoĥovo kaj la saman jaron prezentita al la Sankta Seĝo. Ĝi estis registrita en Romo 3-2-1978.